Profile of Haji Ali Bux Kolachi

تعليمي ماهر ۽ استاد حاجي علي بخش ڪولاچي جو جنم 1938ع ۾ ٽنڊو ڪولاچي ۾ حاجي خان محمد ڪولاچي جي گهر ۾ ٿيو، هن 1952ع ۾ سنڌي فائنل جو امتحان پاس ڪيو ۽ اهڙي طرح حيدرآباد ٽريننگ ڪاليج مان ايس وي ڪورس 1955ع ۾ مڪمل ڪيو، هن پڙهائي دوران درس ۽ تدريس کي وڏي اهميت ڏني، پڙهائي مڪمل ڪرڻ کانپوءِ هن تعليم جي شعبي ۾ خدمتن جي شروعات پرائمري استاد طور ڪئي، 1957ع هن نوڪري جي شروعات ميرپورخاص جي ڳوٺ ٽنڊو ڪولاچي کان ڪئي ۽ 1983ع ۾ هيڊماستر طور رٽائرڊ ٿيو، هن 26 سالن جي تعليمي خدمتن دوران هزارين شاگرد پيدا ڪيا، حاجي علي بخش ڪولاچي تعليم کاتي مان رٽائرمينٽ کانپوءِ سماجي ڪمن ۽ ترقياتي ادارا کولرائڻ ۾ وڏو ڪردار ادا ڪيو، خاص طور تي ڪاليج قائم ڪرائڻ ۽ ميٽرڪ توڙي انٽربورڊ جو امتحاني مرڪز توڙي گرلز پرائمري ۽ مڊل اسڪول، پبلڪ لائبريري، ڪلچر هال، پوسٽ آفيس ۽ ٻيا سماجي ڪم شامل آهن، حاجي علي بخش ڪولاچي سماجي خدمتن ۾ وڏي رقم پڻ خرچ ڪئي، هن پنهنجي خرچ سان اکين جي مريضن جي علاج لاءِ مفت ڪئمپون پڻ لڳرايون، حاجي علي بخش ڪولاچي مختلف ادارن جي قيام لاءِ پنهنجي زمين ۽ وس آهر مالي مدد پڻ ڪئي، سندس ڪوششن سبب ڪيترن ئي نابين ماڻهن جي نظر بحال ٿي، هي مڻيادار ماڻهو 5 جولاءِ 2005ع تي دل جي عارضي سبب هميشه لاءِ وڇڙي ويو، سندس قائم ڪيل ادارن ۽ ڪاليجن ۾ تعليم ۽ سماجي ڪم جاري آهن، سندس اولاد حاجي علي بخش ڪولاچي ويلفيئر ٽرسٽ پڻ قائم ڪئي آهي، جنهن تحت هر سال ڳوٺ ۾ ترقي ۽ سماج کي سڌارڻ جا ڪم ڪيا ويندا آهن. حاجي علي بخش ڪولاچي کي 4 پٽ ۽ 6 نياڻين جو اولاد هيو ـ